Nirxandin: Blue Jasmine

 Yek ji fîlmên min îsal pir meraq dikir jî Blue Jasmine bû û di dawiyê de min temaşekir. Woody Allen dîsa fîlmek bi stîla xwe kişandiye. Ku zatî ez qet jî şaş nemam. Dema ez fîlmên Woody Allen ên din difikirim ev fîlm ji min re pir xweş nayê. Wer xuyadike Woody Allen êdî fîlmek wek Annie Hall nakişîne. Liger van hemû tiştan dîsa jî Blue Jasmine fîlmek serfiraz e.

  Fîlm du qetên ji jiyana Jasmine(Cate Blanchett) bi hev re têdigihîne. Bûyerên di van qetan de pêk tê paralelî hev diherin. Aksîyona jiyana Jasmine di van qetan de bi awayekî biserfiraz bi hev re radibe û dadikeve. Ev jî ferqa Woody Allen be gerek. Jasmîne jinek gelek xweşik e û bi xapandinan mêran bi dû xwe ve dixe. Di qeta ewil de bi mêrekî (Alec Baldwin) re dizewice û dawiyê dilê vî mêrî dikeve jinek ciwan û wê berdide. Jasmine pistî vê bûyerê dihere cem xwişka xwe (Sally Hawkins), li cem wê dimîne û di partîyekê de zilamekî dibîne û disa bi derewan nava xwe û vî zilamî xweş dike. Xwe şaş naskirin dide. Piştî demekê zilam dixwazê bi wê re bizewice û dest bi amadekariya zewacê dikin. Lê beri zewacê ew bi mêrê xwişka Jasmine ê kevn re rast tên û zilamê ku wê bi Jasmine re bizewice derewên Jasmine fêhm dike û bûyerên din pêk tên. çi dibe çi nabe.....

 Fîlm îsal di sê beşên oscarê de bûye serendam. Van beşan bi Cate Blanchett 'serleyzvana herî baş', bi Sally Hawkins 'leyzvana alîkar a herî baş' û bi Woody Allen 'senaryoya herî baş' in. Ez bawer nakim îsal tu oscarî bistîne lewra serendamên din di van beşan de ji Blue Jasmine çêtirin.

Derhênerî: 8.0
Senaryo: 8.0
Sînematografî: 7.5
Leystikvanî: 7.8
Muzîk: 7.5

‎Mazlum Özdoğan

GOTAR NIRXANDIN SÎNEMAYA BIYANÎ

'Dengê Bavê Min' dengê serdemekê ye

Fîlmekî bi navê "Dengê Bavê Min". Ev deng dengekê bavekî kurd e lê ger mirov bi awayekî berfireh lê binêre dengê gelek bavên kurdan bi xwe ye. Her kurdek dikare di nav vî dengî de parçeyeke ji dengê xwe bibîne.

Em qala fîlmê derhêner Zeynel Dogan û Orhan Eskikoy "Dengê Bavê Min" dikin. Di fîlm de Zeynel Dogan, diya wî Basê Dogan, hevsera wî Gulîzar Dogan dilîzin. Û bi dengê bav jî Kemal Ulusoy beşdarî fîlm bûye.

Fîlmê "Dengê Bavê Min" piştî Festîvala Fîlman a Rotterdamê di vê meha avrêlê de beşdarî 31'emîn Festîvala Fîlman a Navneteweyî ya Stenbolê bû û Xelata Senaryoya Herî Serketi girt.
Fîlm li Meraşê, bi kurdiya wê derê, bi dengê bavek ku çûye xerîbiyê; komkujiya Meraşê, kurê ku temaşevan jê fêm dikin ku çûye çiyê û çîroka birê din ku dikeve dû çîroka wan; bi gotineke din dikeve dû çîroka xwe; tevî diya xwe, çîroka serdemekê, kîteyên ji 30 salên dawî nîşan dide. Fîlm bi atmosfereke giran, lê bi hûrbînî wekî ku bixwaze temaşevan li ser her peyvê bifikire diherike. Ev giranherikîna fîlm temaşevanan hinek aciz bike jî fîlm bi xwe asmosfera wê serdemê, giraniya mijara xwe baş derdixe pêşberî temaşevanan. Dengê bav ku baş li fîlm anîne; deng bi xwe bûye wekî lîstikvanekî û bi awayekî serketî cihê xwe di nav fîlm de girtiye.
Piştî fîlm yek ji derhêner û lîstikvanê fîlm; di heman demê de xwedî çîroka rastîn Zeynel Dogan bû mêvanê me. Zeynel Dogan ku ji Mereşê ye li Amedê dijî, di Konservatuara Bajêr a Aramê

Tîgran, di Beşa Sînemayê de dersên sînemayê bi kurdî dide. Ev du sal in di wê beşê de bi kurdî dersên sînemayê didin û her du salan carekê yên bi serketî serdema dersê derbas kirine bi wan fîlm, belgefîlman didin kişandin.

Giraniya atmosfera qetlîama Meraşê

Zeynel Dogan dibêje em ciwanên wê serdemê di atmosfera bajarê qetlîamê, li bajarê Meraşê hatin dinê, fîlm jî vê atmosferê tîne ziman û wisa didomîne: "Di nav min de, di nav me de jehrek ku divê em biavêjin derve heye. Fîlmên ku divê qala me bikin hebin. Li ser van herduyan min got divê ez vî karî bikim. Pirsgirêkên ku malbat dijî hene. Ji vê yekê em ketin rê ku malbata min profîla gelek malbatên kurdan e. Hestên bi bavê min re eleqedar, hesabpirsîn... Min ev bar ji ser xwe avêt. Bi fîlmên wisa em jehrê di nava xwe de dikin der. Bi awayekî em xwe terapî dikin."

Dogan dibêje ku divê li ser Meraşê û qetlîama wê derê çîrok hebana, fîlm hebana û van yekan lê zêde dike: "Ji ber ku qetlîama Meraşê gelek bandor li wê derê kiriye. 33 sal in qetlîam çêbûye, hê li ser fîlm nehatine kişandin. Nedibû em ser vê yekê binixumînin. Bi vî fîlm em hinekî jî hesabê dipirsin."

Ronesansa devoka Meraşê

Di fîlm de devoka kurdî ya wê derê, ya Meraşê baş hatiye bikaranîn. Di vî warî de Mazlum Dogan alîkariya fîlmsazan kiriye. Derhêner Zeynel Dogan vê devoka aliyê Meraş, Efrîn, Semsûr,

Meletî di nav kurdî de wekî dewlemendiyekê dibîne û dibêje: "Hinek dibêjin 'kurdiya we bi qapî qapatmiş bike bi sînor e'. Bi vî fîlmî di heman demê de me nîşan da ku kurdiya me bi vê yekê tenê ne sînorkirî ye. Dibe ku wan mirovan zimanê xwe ji bîr kiribe lê devoka wê derê dewlemend e û bi vê dikare fîlm bê kişandin. Kurdên wê derê jî dibêjin kurdiya me bi sînor e lê na. Me bi vî fîlmî ev nêzîktêdayîn jî têk bir. Ger kurdên li vê herêmê bi vê devokê têkiliya xwe baş saz nekin, dê nikaribin bi kurdiya giştî re jî têkilî saz bikin. Bi awayekî me têkilî jî danî. Bi vî fîlmî devoka vê derê me yekem car tomar kir. Mazlum Dogan ji bo vê yekê dibêje; 'Ji bo kurdiya Meraşê serdema navîn bi dawî bû, serdema nû dest pê kir'. Ev fîlm ronesansa devoka vê herêmê ye."

Tempoya rastiya jiyanê

Çawa ku jiyan her bilez naherike carinan hêdî diherike, carinan giran dibe, fîlmê "Dengê Bavê Min" jî wisa dibe. Ev giran herikîna fîlm carinan dibe sedema aciziya temaşevanan jî lê Zeynel Dogan vê yekê wekî pirsgirêk nabîne û van gotinan tîne ziman: "Di nav tempoya jiyanê de sekanek heye. Di TV'yan de, di sê saniyeyan de plan neguhere mirov hema li cihek din dinêrin.

Mirov hînê vê yekê bûne. Tiştên mirov jêre dibêjin acizî jiyan bi xwe ye. Ev çîroka me divê bi vî awayî bihata vegotin. Divê mirov bi kurdan, elewiyan, gerîlayan re empatiyê saz bike. Hinek radibin dibêjin 'Hûn çima nabêjin terorîst?'. Em di vî fîlmî de çawa bibêjin? Mehmet karakterê vî fîlmî ye. Kar û emelê wî heye lê di heman demê de pirsgirêka kurd a Mehmet jî heye. Hinek dibêjin 'em ji wan re kar bibînin dê ev pirsgirêk çareser bibe'. Ev fîlm di heman demê de vê nêzîktêdayînê jî têk dibe."

Dogan dibêje em dixwazin ezbera giştî ya sînemayê jî serobino bikin û wiha dawî li gotinên xwe tîne: "Piştî li fîlm hat temaşekirin ger cîhana Basê hat fêm kirin wê çaxê fîlm gihîştiye armanca xwe. Fîlm tehmek dide yan na, ev yek girîng e.'


Cemil Oguz / Diyarname

GOTAR NIRXANDIN SÎNEMAYA KURDÎ

The Descendants; Piştî trajediyek "jiyanek nû"

Fîlma "The Descendants" di vîzyonê de ye.



The Descendants ku di rola sereke de George Clooney cîh digre bi sehneyên xwe yên drama ên serkeftî balê dikşîne. Fîlma ku ji aliyê derhêner Alexander Payne ve hatiye birêvebirin ji romana Kaui Hart Hemmings a bi heman navî hatiye vegûhestin.

The Descendants di 5 beşan de wek berendamê Oscarê hate nîşandan û 2 heb jî Gilovera Zêrîn (Fîlma herî baş û lîstîkvanê herî baş) bi dest xist.

Di fîlmê de behsa hewla ava kirina jiyanek nû û ji nû ve têkîlî dayina bi keçên xwe a zilamekî ku piştî qezayekî jina wî giran brîndar bûye dike.

Fîlm bi lîstikvaniya baş a Clooney û çîroka xwe ya xûrt hêjayî temaşe kirinê ye. (HAWAR NET)


Derhêner: Alexander Payne
Lîstikvan: George Clooney, Amara Miller, Patricia Hastie
Welat: DYA
Cure: Komediya dramatîk

FÎLMÊ BÎYANÎ NIRXANDIN NÛÇE SÎNEMAYA BIYANÎ

"Demsala Nêçîrê"

Fîlmê derhêner Yavuz Turgul “Demsala Nêçîrê”(Av Mevsîmî) di van rojên dawî de ket vîzyonê. Mixabin min bi xwe di vî fîlmî de tu nêçîr nedît û tu nêçîrvanan jî nedîtin



FAYSALÊ ÛSIV

Fîlmê derhêner Yavuz Turgul “Demsala Nêçîrê”(Av Mevsîmî) di van rojên dawî de ket vîzyonê. Mixabin min bi xwe di vî fîlmî de tu nêçîr nedît û tu nêçîrvanan jî nedîtin. Bi rastî, ji ber ku nivîsandina senaryo û Derhêner Yavuz Turgul bû bi hêviyeke mezin ez çûm e sînemayê. Fîlmên ku Yavuz Turgul senaryoya wan nivîsandine, wekî, Çîçek Abbas, Eşkiya, Gonul yarasi gelekî bi serketî bûn. Ji ber vê jî hinekî bi hêviyên mezin min li fîlm temaşe kir.

Di destpêka fîlmî de, destekî ji çengê hatî qutkirin li ber avekî tê dîtin. Piştî vê dîmenê, lehengên fîlm xwe didin xuyakirin. Komserê maseya cînayetan Nêçîrvan Ferman (Şener ŞEN), Idrîsê Dîn (Cem YILMAZ) û Şagirt Hasan (Okan YALABIK) yeko yeko tîne nasandin. Temaşevan di dekoreke ev qasî polîs heyî de li hêviya fîlmekî polîsiye ye, mixabin çîroka fîlm xweş dest pê dike lê meraqê naxe dile mirov de. Nîve fîlm bi lêgerîna li xweyê destê jêkirî diborê û heta ev lêgerîn xilas dibe jî fîlm mirov dikişînê nava xwe. Lê piştî naskirina xwediyê destê jêkirî çîroka fîlm êdî bê armanc dimîne. Wexta ku, bersûcê bi navê Battal Çolakzade( Çetîn TEKÎNDOR) tê naskirin, herikîna fîlm di golekî de diteqine. Êdî mirov naxwazê li fîlm temaşe bike. Ji ber ku meraqa temaşavan bi kêreke kuh tê gurandin.

Berî fîlm bi nîvî bibe, xwediyê destê jêkirî tê naskirin. Xwediye destê jêkirî keçika bi navê PAMÛK e. Çîroka vê keçikê parçe parçe tê vegotin. Sedema kuştina wê jî herwiha di dawiya fîlm de xuya dike.
Di dawiya fîlm de, Nêçîrvan Ferman, qesasê xwediyê destê jêkirî tespît dike. Dera ku qesas Battal Çolakzade li xwe mikur tê, li dora mala wî ya nêçîrê ye û dera destê jêkirî lê hatî dîtîn jî nêzîkî vê malê ye. Vê carê mirov ji xwe dipirse “bavê min, wextê mirov destekê jêkirî li cem mala camerêkî bibînê, qey mirov naçe jê napirse, li ser vê meselê tu tiştekî zanê an na.” Divê cîhana ev qas fireh de ev çîroka fîlm bi aqila nakeve. Wekî ku di destpêkê de jî me gotî, di fîlm de tişta herî qels senaryo ye.
Wekî gelek fîlmên Tavuz TURGUL, dîsa muzîka etnîk hatiya xebitandin. Lîstikvan Îdrîsê dîn, strana hunermend Kazim KOYUNCU bi dengê xwe distirê û rengekî xweşik dide fîlm. Her wiha diya Îdrîs bi zimanê Lazkî diştexile û ev jî ji zimanê ber bi windabûnê ve diçin re wekî şabaşeke xweş e. Muzîk û der û dekora fîlm xweşik hatiye çêkirin. Bi taybetî rengê avê û daristanê bi zanebûn ji sahneyên din cuda hatiye çêkirin.

Li gorî min Derhêner Yavuz TURGUL, wekî di fîlmên xwe yê binavê, Çîçek Abbas, Eşkiya, Gonul Yarasi de, dîsa têkîliyen gundîbûn û bajarvaniyê dide xuya kirin. Li aliyekê din jî têkiliyên çînî têne vegotin. Di fîlmê NÊÇÎRVAN de jî dîsa çîroka kesê ji gundan koçkirî metropolan û yên xwedî metropolon tê vegotin. Yên ji gund hatî malbata keçika hatî kuştin in, yên bajarî qesasê keçika binavê PAMÛK e. Lê derhêner wekî hercarî çîrokeke bajarî aniye ser perdê. Di fîlmên derhêner de, leheng ji ku werin bila werin herdemê çîroka bajarvaniyê ye mijar. Derhêner di vî fîlmê de xwestiye, fîlmekî POLÎSÎ çêke lê, derhêner xwe dîsa li nav drama bajarvaniyê xistiyê. Ji ber vê jî mirov nikarê fîlm bike kategoriyekê de.
Ez dibêjim ev fîlm, wekî kû ewqas reklama wî hatî kirin nîne. Bi hêviyeke mezin divê mirov neçê sînemayê. Azadiya Welat

FÎLMÊ BÎYANÎ GOTAR NIRXANDIN