Festîvala Mêrdînê Sînemardîn îsal di navbera 8-15'ê pûşperê de dê 7'emîn car li dar bikeve. Di festîvalê de bi dehan fîlmên metrajdirêj, kurtefîlm û belgefîlm hene ku di nav de gelek fîlm û belgefîlmên bi kurdî jî hene.
Di beşa kurtefîlman de 10, di beşa belgefîlman de 9 belgefîlm bi hev re dê bikevin pêşbaziyê.
Murathan Mungan dersê dide
Gelek kesên navdar jî di çarçoveya festîvalê de dibin mêvanên Mêrdînê. Yek ji wan Murathan Mungan e ku wekî "Mêvanê Rûmetê" dê li Mêrdînê be û dersê bide. Di atolyeya ku wê bi mijarên 'di nivîsandina senaryoyê de rewşa dramatîk, gramera cureyan, matematîka vesazkirinê' de wê Mungan dersê bide.
Demirkubuz bi temaşevan re tê ba hev
Yek ji derhênerên navdar ê Tirkiyeyê Zeki Demirkubuz ku herî dawî fîlmê xwe "Yeralti" kişand û di Festîvala Fîlman a Stenbolê de xelata Derhênerê Herî Serketî jî di nav de 5 xelat girt dibe mêvanê Sînemardînê. Demirkubuz piştî nîşandayina taybet a Yeratiyê dê bersiva pirsên temaşevanan bide.
Şewket Emîn Korkî jî tê
Derhênerê kurd Şewket Emîn Korkî bi fîlmê xwe yê duyemîn "Kick off Kirkuk" dibe mêvanê Mêrdînê. Fîlm li Kerkûkê hatiye kişandin. Jiyana kurdên piştî têkçûna Sedam Huseyîn careke din vegeriyane Kerkûrê ku li stadeke fûtbolê cihwar bûne mijara fîlm e. Piştî nîşandayîna fîlm Şewket Emîn Korkî dê derkeve pêşberî temaşevanan.
Derhênerê 'Mîkrofan'ê tê
Derhêner Ehmed Ebdulla (Ahmad Abdalla) ji Misrê û ye di sala 2010'an de fîlmekî bi navê "Mîkrofan" bi makîneya fotografan 7D kişand. Fîlmê ku li Îskenderiyeya Msirê hatiye kişandin bi ser muzîkê re balê dikişîne ser pirçandîniyê. Fîlm di sala 2010'an de li Festîvala Fîlman a Kartacayê û di sala 2011'an de li Festîvala Fîlman a Stenbolê Xelata Fîlmê Herî Serketî girt. Ebdullah digel "Mîkrofon"ê dê li Mêrdînê be.
Mecîd Mecîdî jî tê
Ji Îranê îsal derhêner Mecîd Mecîdî dibe mêvanê Sînemardînê. Par derhênerê kurd Behmen Qubadî bûbû mêvan, Sînemardînê îsal gazî Mecîd Mecîdî kiriye. Mecîdî (1959, Tehran) di salên 1980'yan de dest bi kişandina kurtefîlm û belgefîlman kiriye û yekemîn fîlmê xwe yê metrajdirêj jî di sala 1992'yan de kişandiye. Di sala 1997'an de fîlmê wî "Zarokên Bihuştê" bûye berendama xelatên Akademiyê. Mecîdî ku heta niha fîlmên wekî "The Fathen" (1996) û "Baran", "Strana Çivîkan" kişandine, li qada navneteweyî gelek xelat jî girtine.
Fîlmên bi kurdî
Di festîvalê de gelek fîlmên bi kurdî jî hene. Di warê fîlmên metrajdirêj de wekî fîlmên bi kurdî ev fîlm hene: "Anadilim Nerede" (derhêner Veli Kahraman), "Dengê Bavê Min" (DerHêner Orhan Eskikoy, Zeynel Dogan), "Kick-off Kirkuk" (Derhêner Şewket Emîn Korkî), "Ez Firiyam Tu Ma Li Cih" (Derhêner Mizgîn Mujde Arslan), "Rêç" (Derhêner M. Tayfur Aydin), "Li Vir" (Derhêner Haco Çeko)
Belgefîlmên bi kurdî
Di beşa belgefîlman de jî çend belgefîlmên bi kurdî hene. "Evcilik" ê Bingol Elmas ku li ser keçên di zarokatî de dizewicin; "Maya" yê Rodi Yuzbaşi ku bi ser dengêjan re parçeyeke jiyanê nîşan dide; "Min Kîyim" ê Esin Akgul ku li ser eşîra Şêxbiziniyan hatiye kişandin; "Dengê Pepûkê" ê Caner Canerik ku li Dêrsimê li ser lêgerîna kokek hatiye kişandin; "Rewşen" ê Cemil Oguz ku bi ser kovara Rewşenê re qala zimanê-wêjeya kurdî û anekdotên salên 90'î dike dê derkeve pêşberî sînemahezên Mêrdînê.
***
Diyarname - Cemil Oguz
Has laoreet percipitur ad. Vide interesset in mei, no his legimus verterem. Et nostrum imperdiet appellantur usu, mnesarchum referrentur id vim.
0 yorum:
Post a Comment